ကိုဗစ်-၁၉  ကပ်ရောဂါဟာ  မတည်ငြိမ်သေးကြောင်း ကမ္ဘာ့ကျန်းမာရေးအဖွဲ့ သတိပေး

၂၀၂၃ မတ်လ ၉ ရက်နေ့က အမေရိကန်နိုင်ငံ မန်ဟက်တန်မှာ တွေ့ရတဲ့ ကိုဗစ်-၁၉ သတိပေးဆိုင်းဘုတ်
Photo Credit: (Photo: AFP/Spencer Platt/Getty Images)

ဂျနီဗာ၊ ဧပြီ ၁၈

ကိုဗစ်-၁၉ ကပ်ရောဂါဟာ ဆက်လက်ဖြစ်ပွားနေဆဲ ဖြစ်ပြီး မတည်ငြိမ်သေးကြောင်းကို ကမ္ဘာ့ကျန်းမာရေးအဖွဲ့ (WHO) က ဧပြီ ၁၈ရက်၊ အင်္ဂါနေ့ မှာ သတိပေးပြောဆိုလိုက်ပါတယ်။

ဒီနေ့အချိန်အထိ ကိုဗစ်-၁၉ ကပ်ရောဂါဟာ မငြိမ်မသက် ဆက်ဖြစ်နေပြီး ကြိုတင်ခန့်မှန်းနိုင်တဲ့ အခြေအနေကို မရောက်မီ နောက်ထပ်ပြဿနာတွေ ရှိလာနိုင်တဲ့ အကြောင်းကိုလည်း ပြောဆိုပါတယ်။

ကမ္ဘာ့ကျန်းမာရေးအဖွဲ ဆီကို တင်ပြလာတဲ့ အချက်အလက်တွေအရ လွန်ခဲ့တဲ့ ၂၈ ရက်အတွင်း သေဆုံးမှု ၂၃,၀၀၀ ကျော်နဲ့ ရောဂါကူးစက်မှုအသစ် ၃ သန်းကျော် ရှိနေဆဲ ဖြစ်တဲ့အကြောင်း သိရပါတယ်။

“ကူးစက်ဖြစ်ပွားမှုအရေအတွက်တွေ လျော့ကျနေချိန်မှာပဲ သေဆုံးသူတွေ အများကြီးရှိနေဆဲဖြစ်ပြီး ဖျားနာသူတွေလည်း အများကြီးရှိနေဆဲပါ” လို့ ကမ္ဘာကျန်းမာရေးအဖွဲ့ရဲ့ အရေးပေါ်ဌာန ဒါရိုက်တာ မိုက်ကယ် ရိုင်ရန် က သတင်းစာရှင်းလင်းပွဲ မှာ ပြောကြားခဲ့ပါတယ်။

ကမ္ဘာ့ကျန်းမာရေးအဖွဲ့ရဲ့ ကိုဗစ်-၁၉  အရေးပေါ်ကော်မတီဟာ နောက်ထပ် သုံးလတစ်ကြိမ်အစည်းအဝေးကို လာမယ့် မေလ အစောပိုင်းမှာ လုပ်ဖို့  စီစဉ်ထားတယ်လို့လည်း သိရပါတယ်။

အဖွဲ့ကြီးရဲ့ အဆိုအရ နိုင်ငံတချို့မှာတော့ ကာကွယ်ဆေးမထိုးရသေးတဲ့ ပြင်းထန်စွာ ကူးစက်ခံနေရတဲ့ လူနာ တွေ အများ အပြားရှိနေဆဲဖြစ်ပြီး တချို့နိုင်ငံတွေကတော့ အရေးပေါ်အခြေအနေမဟုတ်တော့ကြောင်း ကိုလည်း ခြုံငုံပြောဆို ခဲ့တယ် လို့ သိရပါတယ်။

Ref: cna

Visited 2 times, 1 visit(s) today

Leave a Reply

Your email address will not be published. Required fields are marked *